مواويل – 67
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
الميه عكره والقطين قراقره وصليبة القمح زوان ، والدم والعرق راحوا هدر والضباع أكلوا الإنسان
وصارت الحياه غابه البقاء فيها للأقدر والأقوى ، يا بنرحل عنهم يا بنظل نتوّقع الموت بالنياب والسّنان
************************
زعلان وزرمان وبدّي أنفجر من غيظي ألطف يا لطيف ، يا ربي إشي مش طالع بأيدي ومشوّي ومقلّب مثل الرغيف
ورضف الطابون ملزّق بظهري وبطني يشويني عذاب ، يا رب ارحمني ما بسألك رد القضا بسألك التخفيف
************************
الفقر معربش فينا وين ما رحنا ووين ما اجينا ، إن سدّينا بوجهه باب يفتح أبواب ويلاقينا
الفقر مسيّجنا بشياكه وحايطنا داير مندار ، ومذوّقنا الحسره والمرار ومخلي الويل حايف فينا
************************
العمر مثل دم المجرم مباح وللكل مهدور ، والدنيا جوره كبيره قبر جماعي والكل مقبور
لا ترفع صوتك و اتصَرِّخ واتمّلي الدنيا احتجاج ، هانت ولاَّ صعبت صعبه والكل منها مقهور
************************
أنا كلب وظهري مكسور وحيطي واطي ونطوا عني ، وهو سبع وظهره مجبور وحيطه عالي وما هو متعنّي
الدنيا منذوره لناس ومحرومه عَ ناس يا ناس ، واحد مقهور وواحد مسرور ، وواحد حزين وواحد بغنّي
************************
رحنا عَ البنك الدولي وبُسّنا قفاه واترجيناه ، يداينا أكم من مليون وضمانه كبيره أعطيناه
أعطيناه أرواح الناس يصهرها مثل الرصاص ، وانطشّها بين إيديه ونحط رقابنا عتبه لحِذاه
************************
تحت الأوامر يا البنك الدولي إحنا راضخين ، ما خلينا للشعب شكاره ولا حفنة طحين
لعَنّا أبو العامل في عزا أم الفلاّح ، ولحّقنا عَ النوادي والبارات والقوّادين
************************
سلخنا جلود الناس وحشيناها بالتبن ، وما خلينا جريح يقدر يصرخ وايئِّن
مرّه بخنجر الغدر ومرّه بالعصا والكرباج ، ومصينا دمهم وحمَرّنا خدودهم والصفعات تزيد
************************
يقصف عمر الصبايا ما أحلى شوفتهن ، لو ببقى بقلبك بحر هموم الفرحه بتفرّجهن
خدود مثل العنبر وشفاف اللهُ أكبر ، وصدورهن مثل الذكرى ناقوس بوجدانك بترّن
************************
قلت لها يا حلوه شو ها لخد,قالت سكر بوزك وانسّدّ ، خدي من الله مصيون يذبح قلبك عن جَدّ
خد الحلوه بنقط فتنه صاوب بسهامه القلب ، والحلوه مغروره بالخد ويروح القلب الها عبّد
************************
سرينا من الصبح بدري والندى عَ الزرع يجري ، معانا المناجل والرواجد معانا الزواده اللي بتغري
ولمّا استقامت الشمس في السما ولفحنا حرّها ، قعدنا نوكل ونغني للأرض اللي بالزرع تثري
*******************
تقرأ بلهجة أهل سنجل