مواويل – 68
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
درنا ودارت فينا الدرب وكل ما طالت تعب القلب ، ويا الله انت الشاهد ارحمنا واعطينا يا رب
أعطينا صحه ومال,وخير ومطر وغلال ، وكسّبنا رزق الحلال,وهَوِّن علينا الصعب
************************
الغيث الغيث يا ربي,يسقينا وللحاجه يلبّي ، يسقي الأرض العطشانه,تطلع من جوَّاها الحَبّهِ
نقص فريكه ونحرقها,نحصد الزرعه ونرجدّها، وعَ البيدر ملقانا عَ البيدر,ندرس ونذرّي ونخبّي
************************
قالوا الموسيقى أفيون اسمعها تتنسى ، لقيت الموسيقى جرح كل ما أسمعها بأسى
لمّا تنصّب عليّ نغمات الناي ولاَّ الوتر ، بتصَحّي حسي لِمْخَدّر,وسفينة عمري بترفع المرسى
************************
كل ما شافتني بفرج الله عليها وبتعطس ، كله من الفرحه فيّ اللي جوّاها بترقص
ولمّن تعطس أنا الضحيه ولمّن ترقص ، يرقص عليّ البربور من رذاذه بخنس
************************
خضره حبّت فلاح وحبها في قلبه ساح ، سبحان الخلاّق اللي بجانس الأرواح
نزلوا عَ المارس صبحية يوم مندّي ، وبين الزرع حبّوا والجيزه لمّا الموسم راح
************************
روينا عن اللي قالوا الشعر ديوان العرب ، بقى النثر وبقت الخَطابه والشعر بقى العصب
بس لمّا دخل الفيديو كليب بصوّر العرايا ، غار الشعر وصار الشاعر ما بسوا كلب
************************
مطرح ما بتحط الراس حط الكعب والمداس ، ما ظل فينا راس إلا وانّداس
والشارب اللي بقى مثل ذنب العقرب ملفوف ، انمعط وتاليه انحلق وبالهيبه بَطّل ينباس
************************
دَرّوشها يا بو الدراويش ولا تخلي السهم يطيش ، عمرك ما بتغنى ولا بطلع عَ جلدك ريش
ما دامك مواطن شريف وما بتسرق رغيف ، حتى لو بطنك صرخ وصاح وانتلى راسك وشيش
************************
الله يعينك يا جوز الثنتين منين تلاقيها من وين ، فكرك تفرح وتتهنى رحت فعس بين الرجلين
يا مسخمط زمانك الهني ولى وراح ، جبت القرد عَ بيتك ووصيت القرد عَ الطحين
************************
عَ الرّمان وعَ الرّمان يا الله ما أحلا النسوان ، محلا السمرا الشلبيه أم سنون المرجان
وما احلا البيضا أم عيون وساع ، والصدر الواسع مورد الحجل والغزلان
************************
الحب مزَرّع بالقلوب,ينبت شتل المحبوب ، قلب امدَلّه وقلب مصاوب وقلب مسلوب
وقلبي ملوّع بالحسره والذكرى ترتع فيه ، وقلب مجمّد بثلّج القطب وقلب مسوسح بحر الشوب
*******************
تقرأ بلهجة أهل سنجل
