مواويل – 69
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
تحت الحلس دَبَرَه تخلي الجحش يعنفص ،أخبار مثل الدفلى مُرّه وأخبار حلوّه بترَقّص
بس المرّه زاد وزواده,تنسف بيت السعاده ، يا للي جايبلها ضرّه,لذيالك كل ما طولِن تقصقص
************************
إن نجحنا بالتوجيهي ولاَّ بالشامل الزيطه زيطه ، وان صار فلان نائب بالبرلمان وبدَّل الحطه بالبرنيطه
ولاّ تجوّز عريس الزين ست الحلا والجمال ، بدنا نزيّط ونطوّط ونطخ ونفعِّط لمّا نهزهز الحيطه
************************
لا تحكي شندي بندي وتقوللي الحياه رتيبه ، كل اثنين بتجوّزوا مثل البطيخه ولاَّ حبّيبَه
بعد سنين بدهم يتغيروا والملل يململهم ، بس افهمها .... ردايدنا ولا قمح الصليبه
***********************
فعطت فخة قلبي وصادت أحلى شنّاره ، وصرت أتباهى بحبيبة قلبي عَ بنات الحاره
فكرت حالي انفتحت لي السما ليلة القدر ، طلعت مخزّوق قفاي مدمل من أثاره
************************
هنيئا للوطن اللي شرب من بدن الفلاّح ، هنيئا للوطن اللي بنفدى بدم اولاده والأرواح
هنيئا لشعب بصنع أسطوره تضوي سطور التاريخ ، بالحجر اللي ما وهن اللي أثبت انّه أمضى سلاح
************************
احنا اللي كتبنا للوطن بدّمنا شهادة ميلاد ، وخلينا اسم الوطن في محافل الدنيا ساد
احنا اللي زرعنا الأرض حب ووفا ، وخلينا قصة الوطن مطرّزه بالأمجاد
************************
موظف بمهنة كلب أحرس طول الليالي ، أعوي عَ طول الدرب لأمر سيدي موالي
بس اللي بتمادى عليّ وبزَوِّدها ، ذنبه عَ جنبه وانا من طرفه خالي
************************
الحراسه من برّه طقشي طقشي ومن جوّه قمل محشي ، بدله هيبه ومهابه وكرافه وقميص منشّي
ديكور مودوكر عَ الفاضي مضروب بحجر كبير ، وعَ رأي المثل يا طفران كل فجل ودَشّي
************************
راحت علينا الفرصه والخاسي أكل القُرصه ، ونمنا عَ الجوع والطوى يقرص في المعده قرصه
الجايع مش بايع بس لو باع المبدأ برغيف ، حقه يدافع عن عمره اللي رايح منه بلصه
************************
عند الجد بنلبس فدائيه وعسكر وبنضحي بالدم ، وبندَرِّس الغاصب اللي حط الخنجر بالظهر ودَس السم
اللي حَجَّم نمرة رجلي تتزغر الأرض تحتي ، بس برجلي بخطو عَ الأرض مع أهلي نصنع عزم
************************
الزمن الأول حوّل والكلب الفالت مربوط ، وتحرر الجمل وبطل يبقى بالحمار مقطوط
بس الإنسان اللي تبدّل وتحوّل وتغَيّر ، صار مربوص جوّه القوالب والقهر عليه محطوط
*******************
تقرأ بلهجة أهل سنجل
