مواويل – 71
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
طول عمر المال دولاب بروح وبيجي وهذي أحواله ، يا ماخذ القرد عَ ماله بروح المال وبظل القرد عَ حاله
سيبك من المال إذا قصدك الرزق الرزق وعد من الله ، واذا قصدك الغنى القناعه غنى الدين راس ماله
************************
العقل زينه للي عنده عقل والجاهل مرتاح ، ضاربها طبنجه عايش فنكري في بلاد الله سوّاح
العقل عاقل صاحبه مثل ما بنعقل البعير، والجهل طايش بصاحبه عَ السبحانيه عايشها مهما لاح
************************
أسفي عَلى اللي شنوا الحرب على التراث ، وخلوا نسيج الوطن الغالي أنكاث
أسفي عَ اللي باعوا الماضي لجل الحاضر ، وبكره الحاضر بنباع مثل قطع الأثاث
*************************
يا ناس يا ناس,شو خلاّ العِرِق دساس يا ناس؟ وشو خلاّ المجرم الخاين ينرفع عَ الراس ؟
شو اللي خلاّ الوطن يلبس بدال ثوب العرس كفن ؟ وبدال ما ينرفع ويرتقي ينخر من الساس؟
************************
قلبي بير بجمع الآهات مثل ما بجمع المطر ، قلبي للحب والأُلفه منذور من القدر
جوّه ها لقلب مخزن للتاريخ بالحفظ والصون ، ينبضه بكل قبضه وبسطه عمره جوّاه ما انحسر
************************
قطعت العسل من خليه في الجبل من حصن النحله ، زرعت خليتها بعيد عنك وختمت عسلها يا ما شا الله
بس ايدك طويله وعينك بصيره وخطوتك واثقه ، طلِعْت الجبل وتحملت العنا وقرص النحل لجل عَ العسل تتحلاّ
************************
خد معَوّد عَ اللطيم ما بتسمع غير الرنّه عَ اصداغه ، لمن تقدح يا لطيف تسمعها وزّت عَ الوجه تتناغى
خدّ معَوّد عَ التلطيش عَ الطالع والنازل مَ فيش ، غير الزنّه والرّنه وفي العرس بتسمع سحب الباغه
************************
أوجاع الأمه بتشقع في قلبي مثل المزراب ، ولمّا أشوف البلاوي ما حِلِي اللي عيش ولا طاب
أنا الطبيب العليل أداوي الناس وامرض ، وكل ما خف بلا عن حدا طب البلا فيّ اطباب
************************
أنا مقيّد بقيد ذهب ولساني مربوط بشعره ، اللي بشوفني بقول القيد اسواره من البسط والطفره
ولساني الرابض جوّه نفسي ساكت لسان حكيم ، بس أنا أسير بقيد الذهب محروس عَ الآخر بالّمَرّه
************************
لو القلب بحسن الابتسامه كان ابتسم وتبَسَم ، كان القلب نبض بحس الشباب وبصوتهم اتكلّم
القلب مسكر أبوابه قدّام الهوا والحب والنسيم ، ويا الله انت العليم بمزاجي وخاطري بتألم
************************
ملعون اللي بغش الناس وبدخل عليهم مثل البرد ، سَرّاق حرامي يسلبهم الصحه والفرحه والسعد
ملعون اللي بشهد لواحد كذّاب يجامله قرضه ، قدِّم السبت بتلاقي الحَد إلنا عندك شهادة وعد
*******************
تقرأ بلهجة أهل سنجل
