أحلام ستي البائدة
أحلام ستي البائده
صورة شعبية تراثية محكية
بقلم ووجدان : الداعي بالخير
صالح صلاح شبانة
Shabanah2007@yahoo.com
يا حيف عليك يا ستي ، اذا بعت سيف سيدك تتشتري لمرتك مداس ،
يا حيف عليك لو تعملها مهما كان
ترى كثير من الناس يا ستي ، ببيع السيف والباروده والأرض تيشبع غرورها ،
ويرضي خاطرها اللي بوّزه الشيطان
اشتري لمرتك ثوب ، اشتريلها مداس ، وخليها أجمل وأحلى الناس ، بس مش بحق الأرض ،
اللي بتعشقها وفيها تزدان
مش بحق المجد والعز ، مش بحق القوه والباس ، مش بحق الدم والعرق ، اللي سيدك ..
عَ الأرض سكبها سيل من خزّان
سيدك عاش ومات ، والأرض في قلبه حلم ، اوعك يا ستي عَ آخر الزمن .....ها لأحلام
تخنقها وتخليها تنهان
ترى ما بسامحك ، ولا سيدك في قبره بسامحك ، ولا الأرض اللي شايفها قدامك بتسامحك ،
بشرفها على مر الزمان
بقت تقوللي ها لحكي ، وانا لسه تحت الحلم زغير ، بعدني ولد غرّ لا اللي مَرَه ولا حبيبه ،
عاشق إلها في هواها هيمان
و لا بعرف من حوّا غير أمي وستي ، وخالتي وعمتي ، وأحاسيس لغيرهن بقت فجه ..،
ما استساغها اللسان
شو معنى الحبيبه ؟؟ قديش ها لمعنى عاش في طفولتي قبل ما يدق قلبي ولا مره ،
لحب ابنيه بشده وعنفوان
بس ستي بقت بحكمتها اتحصني بأدويه ومطاعيم ضد الإنهزام عن ها لأرض وهدفها ،
وضد الهزيمه والخذلان
أرضك شرفك ، عزك ، مالك ، عيالك ، أحلامك وآمالك ، أفراحك وأحزانك ، اوعك يا ستي ،
تبيعه بأي الأثمان
************************
وظلت كلمات ستي اتوز في ذاني سنين وسنين ، وصيه تثير حواسي كل ما شفت حزن ..
عَ الأرض ولاَّ رف غربان
تمنيت أصير عزرايين قبّاض الأرواح ، واكبشهم وارميهم برّه الأرض ، بعيد عن الزرع،
والزرع ، برّه الحلم الريان
حلم سيدي ينبض في قلبي نبض ، عَ التين اللي بقى يا دوبه منمر ، واحنا ندور عَ الدافور
من هان لهان
بقت الدافوره بأول تموز ، ها لتموز اللي بغلي الميه في الكوز ، حلم مشعشع ......... ،
بالنور بالحس الدفيان
تلاقينا مثل العصافير إنطنط من الشجره هذي للشجره هذيك ، ولمّا نلمحها إنُّط عليها ،
مثل النمور الشجعان
بقت حرب بلا هواده ، مين يلقط أكثر من الثاني ، ولمّا نروح معنقرين ، كل واحد منا عبّا طافور لخناقه مليان
تلاقيني ستي بفرحة اللي غاب وجاب ، قديش ستي الله يرحمها روحها معلقه بها لأرض ..
وقلبها فيها هيمان
بس لمّا ماتوا اللي حبّوا ها لأرض ، وافنوا عمارهم فيها ، وورثناها من بعدهم ، فرّت منا ..
مثل عصفور ذعران
طار في بلاد الله واسم الله .. وبدل كروم العنب والتين والزيتون، بنينا فيها عمارات وقصور ،
وخربنا المارس والبستان
********************************
يا ستي حلمك اللي بقى مملي القلب عشق وشوق ، قلعناه من إيدينا مثل الشوك وحرقناه...
وصار غمامة دخان
وكل الحكي اللي قلتيه ، والوصايا اللي بقت تنبض بالصدق وكلامك اللي أحلى من العسل ....
رميناه .. ولفه النسيان
لا تلومينا يا ستي ، صار القمح اللي بقى سيدي يزرعه في رحم الأرض حلم قلعناه مثل الوهم ..
الواقر بالوجدان
وصار القمح يجينا من البواخر من بلاد بره ، وصرنا ندفع حقه اللي ما بندفع خاوه .....
وذل وحرمان
لو ستي ترجع أكم من يوم ..بس لومن الشيطان ،،ستي مش رح تطلع ولا تسمع ..ولا ناقصها أحزان
لا رح تلاقي موارس القمح اللي بقت ذهب أصفر ،تتكوم عالبيادر وبعد الدراس تنحط في الخوابي أحان
صارت حلم وخيال ،وتلاشت عن الأرض ،وحل محلها وعر وبور مقيت ما فيه أثر نثير فينا الأشجان
قديش يا ستي الدنيا من بعدك تغيرت ومعالم وجه الأرض تبدلت ،قديش الأرض حزينه عالإنسانه
قديش قطف العنب اللي مغمس بالكبريت بقى ،وقديش كش لقطوف اللي بقى عهدهن أهر كشيشان
وقديش برقوقة البحر اللي بقينا نلقط عنها سلال وسلال انخسفت بركتها وماطل لها شان
عن إيش ستي حكت وعن إيش ؟لسه كلماتها مثل الناموس بتقرع فيّ ومثل الحلق معلقه بالدان
يا ريت كلماتها تطلع من جوانا ..تنشرها تحت الشمس ،بلكي لما تشم الدفا نرجع الأرض زلام ونسوان
تقرأ بلهجة أهل سنجل
