أسامة البوّاب

أسامة البوّاب
بطاقة شهيد
صورة حية من صور الجهاد الفلسطيني
بقلم الداعي بالخير : صالح صلاح شبانة
Shabanah2007@yahoo.com
قدّيش صعب عَ الأنسان يخالف الفطره،ويقهر أحاسيسه من جوّه، ويحاول يقمع من قلبه الدمعه
ويوقف جبل شامخ ، ظاهره من برّه يقول ، بس من جوّه يهتز وتحترق أحاسيسه مثل الشمعه
مين قال للمفجوع داري جوّه نفسك الدموع ، اخزنها ، وممنوع تظهر على وجهك آثار اللوعه
لا يا عمي ، الدمعه رحمه،بتبلل أحاسيس الإنسان، وبتطفي حرقة الآمه المشتعله جوّاه بسرعه
ليش بنعذر اللي ابنه مسافر في الدنيا لمّا يحضنه تنزل دمعته وبنحرمها تترائى ولو لمعه ؟؟
في عيون أبو الشهيد ، وأم الشهيد ، والشهيد مسافر من الدنيا وما فيها روحه بلا رجعه ؟؟!!
تنقول شامخ ؟؟!! ومين قال إنه مش شامخ؟ شامخ قدّام إرادة الله ، بس الرحمه بتبللها دمعه!!
*******************
معهم حق دموعهم تنزل وتسيل ، معك الحق يا خليل البّواب ، يا أبو الأسد اللي ترَجّل فارس
طول عمر الفرسان بترَجّلوا ، بس ما بنهزموا أبد ، برتسموا بسمه عَ وجه الأرض العابس
الفارس لمّا ينده الواجب ، بتلاقيه مثل الشجر دارت فيه العصاره ، وحيي بعد ما بقى يابس
وهَبّ هبّة بطل ، مزروع أمل بسم حسام ولاَّ أمجد ولاَّ محمد ، وكلهم أبطال صناديد وفوارس
كلهم منذورين لعيون فلسطين،ذرّات كحل ينجروا بمرود الشهاده بعيونها،بتتعلم منهم المدارس
الف باء الشهاده، الف باء العطاء والوفاء والإباء،من أسامه اللي بقى في عيون الوطن حارس
رفض يخلي الموقع للعروس الأمل ، حلم أمه وأبوه ويقوم من الخندق اللي بنى فوقف المتارس
*******************
معه الحق أسامه يوقع شهيد، يعانق الأرض المشتاقه تتحضن ابنها السبع الغالي عليها الحبيب
ابنها اللي كحّل بالفخر والعز عينيها ، وزال قذى الحزن والأسى ، كابوس الزمن العصيب
الأرض يا أسامه ما بتنزرع بالفرح والأمل الا بدّمَك ، ودم شهيد وجريح ، وبحبر كاتب وخطيب
يدَوِّن تاريخك الماجد ، للأجيال الجايه ، مشان تظل حاضر في قلب المستقبل ، وعنه ما تغيب
وتنكتب سيرتك بالذهب ، وتنكتب بالنور جوّه الشمس واللهب، وتندّق أسطوره عَ القلب تتطيب
كل ما سمعها جيل رواها لجيل، تتظل الأجيال تتعلم منك، ومن كل الشهدا معنى الغضب واللهيب
وسيرة أمك وأبوك ، وأختك وأخوك ، وجيرانك واللي حبّوك، وكل من لروحك الغاليه بقى قريب
ارتبطت بالمجد ، من لمّا المجد دنّق وباسك ، وحطك عَ هامته مثل الشمس اللي ما بتغيب
*******************
أبوك وأمك بدهم يضمدوا جرحهم لمّا انصابوا بأخوك الكبير ، وقرروا يشوفوك حد العروس
تيّرَجّعوا الفرحه للدار، ويزرعوها بالأمل،ويقلعوا الشوك من لِقلوب، ويزيلوا المُرّ من النفوس
وبقت أمك شادّه حيلها وتدَوِّر وما بتعرف مين هذيك االمزيونه الجديره بهذاك البطل المحروس
اللي بدها تبقى لأسامه الابن ، اللي نبتت فيه الفرحه ، ونادته الشهاده بمرحى ، نيالك بالأرض اجتك عروس
نيالك بالوطن حلم ، شعشع جوّاك ، نيّال أمك بالمجد اللي كل ما أظلمت الدنيا ، أشعل لها فانوس
من دمك اللي اشتعل، تيضوي من الشرف، وفي كل الوطن فخر واعتزاز، وللوطن عز وناموس
رغم الدمعه الحزينه، في حياتك بقيت بطل، وفي مماتك رمز وأمل ، يتعلم الأمل منك كل متعوس
انه الوطن أكبر من الحزن ، أكبر من الدمع ، الوطن فرح وأمل ، الوطن عَ الهامات والروس
13/12/2000 م
تقرأ بلهجة أهل سنجل