اياد شعث
بطاقة شهيد
صورة حية من صور الجهاد الفلسطيني
بقلم الداعي بالخير : صالح صلاح شبانة
Shabanah2007@yahoo.com
من رحم ها لأرض ، طلع طفل زغير ، تحت الحلم ، بسنه أو سنتين ، حسب نوع هذاك الحلم
إذا ها لحلم حلم رجال ، أبو النقله النوعيه ، هذيك النقله اللي الأطفال بصيروا زلم
اسمه إياد أسامه شعث ، من غزه بلد العزه ، اللي خلت ليل رابين عِتِم
واتمنى في ساعة يأس انه البحر يبلعها ، ويتريح منها ، ويصيبها من دعوته قطِم
بس غزه ظلت غزه ، بلد الكرامه والعِزّه ، غزة هاشم الكرم والجود والشافعي رأس العلم
غزه الحره ، أول شراره للنار الوقاده ، إذا صار ما صار بتلاقيها راس السِهِم
وطله الطفل إياد ، يعَبِّر عن شارع غزه ، لمّا لاحت ساعة حسم
**********
إياد الطفل الزغير ، ما بعرف شو معنى يبقى الأخ السند لثمان خوات بنات
وما بعرف شو معنى ولد صبي في عيله شرقيه ، وحيد ، رجل المهمات
قديش أبوه بقى يراهن عليه لمّا يكبر ، وأمه تتباهى مثلها مثل الجارات
إياد الله يخليه ، بكره بكبر ، ومثل النسر بفرد جناحاته ، وبحقق لخواته الغايات
بس إياد بقى مهووس بالشهاده ، مسكون بالشهاده ، وبقت الشهاده حلم عليه يقتات
قديش في الأسبوع الأخير من عمره ، بقى يتمنى ينال الشهاده في المواجهات
شو هي الشهاده ؟؟ يا طفل ، يا اللي حملت هَم الوطن تصبح فيه وبتبات
*************
زرعت في عيون أمك دمعه ، صعب ينشفها الزمان ، إلا إذا نشفت عيون أمك
وعيون أمك ترقب لِولاد ، إللي من جيلك ، قد حلم الفقير زغار ، سنهم من سنك
وكلما شافت حقيبة مدرسه عَ ظهر طفل ، رح يطلع من عتم الليل نجمك
و رح تظل أمك ، كل ما جالت عيونها بوجوه خواتك البنات ، تغيم بالحزن وهي تذكرك
تنتظر الفارس اللي ترجّل قبل ما يعتلي سرج الفرس ، وتسقي بالدمع لحدك
قديش أطفال بعمر الورد ، انفجرت الرصاصه ألف شظيه وشظيه في روسهم مثلك
صَحّيتوا الحزن قبل الفرح فينا ، صحيتوا النور قبل الليالي تِحْلك
*************
يا طفل يا إياد ، يا ابن الثلثطعشر سنه ، عشتهن ألف سنه وأكثر
سنينك مجد ، محفوره بالشمس ، اللي بتطلع على أرض فلسطين تتهادى وتتمختر
محفور جوّه اللهب والنار اسمك ، ورسمك قدام الأطفال ماشي مثل عنتر
وسيفك من الغمد مسحوب ، ورمحك على السنان ، وشيبوب ماسكلك الأبجر
يا طفل يا اياد ، كل لحظه عشتها من عمرك ، دهر وسنين بالعز يتعطر
اسمك في كتاب المجد انكتب ، الشهيد الحي ، اسمك في كتاب المجد اتسطر
عالي أعلى من قامة السفاح ، أعلى من غروره اللي رح يتكسر
تحت هامتك تِخضَّر الأرض وتتزين ، وفوق هامتك النجم يتلالى ، والبدر يتدوّر
تقرأ بلهجة أهل سنجل
24/10/2000م