محمد أبو عاصي

محمد أبو عاصي
بطاقة شهيد
صورة حية من صور الجهاد الفلسطيني
بقلم الداعي بالخير : صالح صلاح شبانة
Shabanah2007@yahoo.com
قديش التاريخ بروي صُوَّر وأساطير حُيّه، أساطير مليانه مجد بكلل هامة الإنسان
أساطير عن مجد الطفل الفلسطيني ، الطفل الشبل ، اللي مليان قوه ... وعنفوان
ألطفل المدرك ، اللي لسانه عربي ، وقلبه ونخاع عظمه عربي ، من قحطان وعدنان
ويرفض انه يبقى تابع ولاَّ أجير ، دمه حُر ،مشتعل بالنار ، ودمه أعظم أسطوره في الزمان
هيذ التاريخ بخرّفنا ، عن كل الأشبال الأطفال الأبطال اللي لعبتهم الموت، والتراب بدمهم ازدان
اللي كتبوا عَ وجه فلسطين وجبينها العالي ، وكحلوا عيونها الغاليه ونقشوا اسم وعنوان
للبطولة الأسطوره ، تحيا وتحيا وتحيا الأرض ، فداها ارواحنا ، واحنا فِدوى للأوطان ..!!
*******************
محمد أبو عاصي طفل بعمر الورد برعم بُحّضُن الشذى جوّاه ، ما تفتح ولا عبق عَ الحياه
الشهاده في قلبه وعد ، الشهاده جوّاه سَعِد ، والشهاده حبه وحلمه العايش معه وهواه
ناس بتعشق الأرض تتحيا عليها ، وتملي من شذاها إيديها ، وتعمير الأرض ذروة المجد وسناه
وناس بتعشق الأرض تتموت عليها ، وتندفن جوّاها ، وتحرير الأرض فخرالمجد وعُلاه
وبقى الطفل محمد أبو عاصي من الفريق الثاني ، اللي عشق الشهاده والموت أمل تمنّاه
وبالدم كتب اسمه في سجل الخالدين ، بطل فلسطيني عظيم ، ما وقف للمجد ولا استنّاه
المجد إجا لعنده ، وانحنى قدّامه ، ورفعه لفوق فوق ، قدّمه قدّامه ، ومشى وراه
*******************
التاريخ الفلسطيني مجموعه كبيره من الأبطال ، من الأشبال ، من محمد أبو عاصي وأجياله
من بُناة التاريخ الحديث ، للمجد الوطني ، للشعب المتجَذِّر ، بأحلام الوطن وآماله
طفل يقول لك لأ لإنفصام الشخصيه ، شو يعني عدو يقتلك ، وتنمي له أمواله ..؟؟!!
شو يعني يمص دمك ، ويوكل لحمك ، واتدلعن وتميجن عَ ألحانه .. وتغني موّاله..؟؟
رفض الطفل محمد أبو عاصي ، شهيد الوعد والعهد الفلسطيني ، شهيد الحِلِم والرساله
يبقى مستهلك لبضاعة اللي بقتل شعبه ، وفضّل يجوع ويعرى ، وتسوء أحواله ..!!
ولا ينام على حرير ، ويحصل عَ الغالي الأثير ، إذا من العدو ناله
*******************
ها لشهيد الطفل أسطوره ، الحجر رمز مقدس ، من رموز الطفل الفلسطيني الحلم اللي احتدم
هذا ما بملك ، شاور لشوفير السياره بالحجر ، لمّا طالبه بأجره ، وصورة شهيد بعقله ارتسم
كيف الطفل يموت .. وليش الطفل يموت ، ومين اللي بقرر موت الطفل اللي بحكم الموت انحكم
قرر الطفل الشبل البطل،محمد أبو عاصي إنه يبقى شهيد ،وأسطورته درس والأعداء منه تتعلم
وإنه الطفل الفلسطيني رمز ، ولحمه ، مُرّ وقاسي ، وانه كل ما اتوجَعَت الأرض بألمها بتألم
انه الطفل الفلسطيني مص الحليب من بوز الباروده وإنه وكيل عن الأرض الحُرّه وعنها بتكلم
وقرر ينتفض مع المنتفضين، ويستشهد، ويظل مجهول الهويه، مهما تساءلوا ، مين هالضيغم
ولما وسائل الإعلام نشرت صورة البطل المجهول اللي انوجد بلا هويه بالدم الطاهراتحمم
صرخت أمه من وجع قلبها آآآآآآآخ هذا محمد أبو عاصي ..ابني شهيد الوطن الطهور المُعَظم
وسالت مع صرختها دمعة رحمه ، والدمعه حزن وفرح ورحمه ، وكلها من القلب للغالي بتتقدم
5/11/2000 م
تقرأ بلهجة أهل سنجل