محمود العمواسي
بطاقة شهيد
صورة حية من صور الجهاد الفلسطيني
بقلم الداعي بالخير : صالح صلاح شبانة
Shabanah2007@yahoo.com
للشهاده عِنّا قصص مغموسه في التاريخ ، ومتشربه منه مثل خبز الطابون السخن لِمْغَمَس بالزيت
ولكل شهيد قصه ، وقصة حياته وشهادته أسطوره ، مثل بصمة أصبعه ، مبروزه في صدر البيت
خذوا محمود العمواسي مثلا : انسان حَب الأرض ، والأرض حبته ، وكلنا في حب وهوا الأرض عشاق
بس عشق عن عشق بختلف ، في عشق بارد ، وفي عشق مثل الحمام التركي دافي ، وعشق مثل البركان حَرّاق
وفي عشق مثل النعسه في العين ، بنام وبصحى ، وفي عشق مثل الحلم مغناطيسي ، بجاذبيته سرّاق
ومحمود العمواسي مثلاً ، إتجوّز مرتين ، عرس عَ الأرض حضرناه ، وقلنا ألف مبروك
وبعد أربع تيّام بالضبط ، لسه الحنّه عَ كفه حمرا وما بهتت ، أثارها عَ الكف متروك
طلع طلعة فارس ، يذود عن وجه الأرض ، واتاريه لحور الجنه مشتاق
*************
شاء الله ، ومشيئة رب العزه عَ روسنا من فوق، انه محمود العمواسي يِنزَّف أخرى مرّه عريس
لحوريه من الجنه ، بقت على امتداد الخليقه ، من يوم ما ربنا خلاّ الشهادة وعد وأحاسيس
بحِسّهَا الموعود بعرايس الجنه ، في قلبه حلم وضّاء ، كل ما غدت عَ الجهاد العيس
ولمّا تزينت عروس الجنه للفارس البطل المغوار ، نادته المنيه تيوقع عَ أرض الطهاره شهيد
قد نكون يعني مثلا حسينا باللوعه والوجع والألم ، سامحونا !! هذا إحساس انساني مش جديد
من يوم ما ربنا حط الرحمه غصّه في القلب ، ودمعه عَ الهدِب ، بس الشهاده عيد
مليان بالفرح للإنسان اللي اختاره الرب الديان رفيق للنبي والقدّيس
****************
محمود العمواسي عاش بطل ، ومات بطل ، مثل كل الأبطال ، بقت عروسه حلم يتكحل بعينه بشوق
بس حِلِم العرس تزامن مع حلم الوطن ، وصارت الشهاده أسمى طلب ، وطريق للعلا فوق
محمود العمواسي طلبها بصدق ، بقى يتمناها بالقلب ، بقى يعاينها بالنظر ، بقى صادق صدوق
دشر العروس اللي يا دوبها فتحّت عيونها من حفل العرس ، تتبدا رحلة العمر ، رحلة السعاده
مع رفيق العمر ، اللي اختاره القلب ، مش بس اختاره ، لأ ، أعطاه ، العرش والصولجان والسياده
بقت أحلامهم أحلام عصافير ، وين ما هاجر كل طير عن طير في الدنيا يرجع لبلاده
وبقى أول ملبي للنداء الوطن ، محمود العمواسي ، اللي اتشرَّف لمّا نال الشهاده
************
شاء الله ، وما شاء الإنسان ، ومشيئة رب العزة عاليه فوق ، على روس الناس والبشر
شاء الله انه محمود العمواسي يبقى دره في تاج الوطن ، اللي عشق الوطن وجوّاه انقبر
ويحمل أحلام العرس ، عرس الأرض في الذاكره ، فيّ وفيك ، للي استشهدوا قدر
قدرنا نعيش في الساحة حرب وجهاد ، قدرنا نبقى المرابطين المجاهدين ، المزروعين مثل الشجر
نحمي جدايل وعيون جفرا والأرض ، ونموت عرسان وعزبان ، وصبيان وأفراد وزُمَر
قدرنا نشرب كاس العز اللي من دمنا دفعنا قده قدود وقدود
من دم عادل ومحمود ، من دم العريس اللي قال للعروس
مبروك للي استشهد وانتصر
تقرأ بلهجة أهل سنجل