المقاطعة
من نكشات العبقري زيد أبو قراد
بقلم: صالح صلاح شبانة
Shabanah2007@yahoo.com
قيل لإبراهيم بن الأدهم :لِمَ اللحم في السوق غالي الثمن ؟؟
قال : إرخصوه بالترك..!!
والله سؤال وجيه ، بس شو بدهم يوكلوا الناس ؟؟
بس الجواب أوجه ، إرخصوه بالترك ، ليش ؟؟ لأنها التجاره عرض وطلب ...!!!
كِثِر الطلب بغلا الثمن ، قل الطلب ،برخص الثمن ، وزمان قالوا : خذ من المجلوب (الموجود بكثره ) واترك المطلوب (المعروض بكميات قليله)...!!!
بس احنا عاد مشعوطين ، وما بحلالنا الأشي إلا لما يغلا ويصير هيله وهليله ..فبصير المحترم الليّ بوكل وقيه يوكل رطل ،واللي بقى يوكل رطل صار يوكل شوال ..وهات ما مرقع رقعها ..!!
إحنا بلا فخر أمه مستهلكه بتموت في اشي اسمه اجنبي ومستورد ،وإذا يبقى مهرب ببقى أحسن وأطيب...!!!
مره في أمريكا رفعوا التجار سعر البصل ،والبصل ماده مهمه مثل ما بقولوا في صناعة المشروبات الكحوليه ،وصارت كل ست عندها أكم من راس بصل تزتهن من الشباك لماّ الشوارع انتلت بصل ...!!
وروحوا استغنوا في البصل ،شو صار ؟ رضخوا التجار لإرادة الأمه .
قبل فتره صارت أسعار القهوه في الأردن خياليه ،تنادت جمعية حماية المستهلك تعالوا خلينا نقاطع القهوه ، حتى الحكومه بكل مؤسساتها أعلنت أنها رح تمتنع عن تقديم القهوه وتكتفي بالشاي ،طيب إنت يا مواطن قاطع القهوه ..هو جرب ..أبداً ...!!
اللي بقى يشتري وقيه صار يشتري كيلو ..ما هي صارت أطيب ..وبعدين ؟
قعدونا على خازوق مبشم ،والقضيه مش قضية القهوه ،القضيه مجروره على كل السلع الإستهلاكيه .هون يصير غلاء الأسعارّ....!!!
وزمان بقى للفقر خط واحد ..هلقيت عدة خطوه ..مثل ميزان الحراره ..أي نعم الصفر أدنى درجه ..بس عنا من ناقص واحد لناقص أعداد لا تحصى ..وبالتالي بعد ما بقت درجة المِيّه هي الأمل والطموح للمواطن صار الصفر هو الطموح ..متى يا جماعة الخير بدنا نوصل الصفر ؟
أي وين ذيبك والغنم ...؟؟؟!!!
المواطن هو الحيط الواطيه ،بس لولاه هو راضي ومبسوط كان ما ظل حيطه واطيه .
المواطن هو الحيطه المزويه اللي كل الكلاب بترقع رجلها عليها وبتقضي حاجتها ، بس لو المواطن ما هو مبسوط على ها لوضع كان ما قبل فيه ..ليش ؟
لأنه ما في بني آدم محترم عنده مخ وعقل وإراده بقبل هيذ .والفقر مُرّ والحاجه أمرّ وما في أصعب من تبقى بدك شغله لأنها حياتك معلقه فيها ومش قادر تطولها مع أنها املّيَه السوق ..بس إيدك فاضيه وقصيره !!
المجتمع اللي بفهم كيف يلتحم قدام الأخطار هو المجتمع الناجي اللي ما فيه ولا صاعقه بتقدر تحرمه ،ولا عاصفه تقلعه ،دائماً يبقى عَصي عَ الإقتلاع وعَ التدجين ...!!!
بس وين هو المجتمع ؟
وينه يا إبراهيم ابن الأدهم ..رحمة الله عليك ..بقت المشوره على زمانك إلها قيمتها والناس بتلقفوها وبلفوها في الحرير .. مش مثلنا اليوم بحطها الواحد تحت كعب صرمايته وبدهكها مثل قمع السيجاره ...!!!
وخاطركم مع السلامه...،