قبل الرجعه-32
صفحة من سيرة عقلة
سيرة ذاتية بقلم الداعي بالخير
صالح صلاح شبانة
Shabanah2007@yahoo.com
خِلِص الحُكُم وطِلِع عقله من السجن معنقِر ، وصارت ساعة الرجعه...
مش فجعه ، ولا بد عنها .. قدّيش حضَر الها ، وقديش وقف قدّام لِمرآه
يطالع نفسه ..لازم يرجع عُقلة أيام زمان .. يرجع بنفس الثوب ،
والحطه والزربول ...بهيئة الفقير اللي سحقته الحياه..!!
لازم يعرف الناس مليح .. وبقى يتمنى من أعماقه إنهم ما تغيروا...،
مثل ما تغيّر ..وظلّوا للأرض خدّامين وحُماه..!!!!
لازم يحط أمواله في كيس يحمله عَ ظهره ويفوت عَ البلد ...،
حزين كسير الخاطر ، كسيف مهزوم .. الدهِر بالويل رماه
ولازم يشوف حليمه ، هي بعدها عَ العهد ولاّ سترها ابن حلال ،
وانسدل الستار ورَوَّحوا الممثلين والرواه ؟؟
واذا بعدها ، يا ترى بتحبه ، وبعد بدها خاطره مثل أيام زمان ،
ولاَّ أطلعته من حياتها.. وشقعته وتناولته في لِهواه...؟
إذا الناس همه الناس وحليمه هي حليمه .. إبشري يا بلدنا ..،
بالخير كل الخير ... واذا اتغيروا ...بتبقى مأساه ...!!
تقرأ بلهجة أهل سنجل
