أنا المواطن

أنا المواطن
صورة مغموسة بالمرارة والألم عاشها مع أبناء أمته
الداعي بالخير : صالح صلاح شبانة
Shabanah2007@yahoo.com
أنا المواطن ابن الوطن بلا وطن ، تايه عَ وجهي في رحلة سفر
من كل جهير شربت حفنة مية ، من كل نُقُر في حجر
أنا إبن الوطن اللي بقى حلم ، عَ مد السمع والبصر
وطن يا ما قرينا عنه في الكتب ، بمتد من النهر للبحر
وكل ما خطب زعيم صرخ ، بصوت مثل الرعد هدر
****************************
بس الوطن ظل بعيد ، مشيك بالحرس والخطر
والنفس بتفافي شوق إلو ، حب معتق في الحشا انحفر
وطن شرب دم لمّا ارتوى ، غيماته بتحمله مع المطر
وطن انزرعت فيه جثث ، للشهدا أكثر من الشجر
وأرضه ربيعها لونه أحمر ، حنّون بسبح عَمد النظر
*************************
أنا المواطن إللي عاش الوطن حلم ، لا خان أرضه ولا ترابه ولا غدر
أنا اللي أكل من اللسين والركف ، وحر اللوف في بطنه استعر
وشوا جدايل البزيز في الطابون ، ولا تكبر عَ القريه ولا بطر
**************************
أنا المواطن الموسوم بحب الوطن ، عاشق الأرض والسما والمطر
عاشق الغيم والريح والدفا ، والطيب والوفا عليه قدر
*************************
أول مره انتدبوا علينا حمران ، الشر فيهم إختمر
وقالوا ناطور الكرم غاب ، وسرب الدباعي في الكرم انتشر
قلنا خلوا الكرم بلا ناطور ، عُمر ظالم بأرضنا ما انتصر
بالفخ والجفت والخرطوش ، بالإيمان بنحمي الكرم والشجر
***********************
احتلونا بالسلاح وبفتوى أهل العلم ، بأشكال وأرقام ونُمَر
وصفّينا فوق ارضنا عبيد ، ويا ما الكرباج في ظهورنا حَفر
وكل يوم بنقول يا فرج الله ، ولهلبت الثوره وقدحت شرر
وانتلا الكرم دباعي ، وحاف بكرمنا الغالي الخطر
وأخذوا عريشنا ومنطارنا والصيره ، وصرنا قطيع عَ وجهه دشر
***************************
أعطونا خيمه وحفنة طحين ، وذل السؤال علامات وصور
وجرح غاص جوّات القلب ، ودمعه حزينه طفت نور البصر
وصرت أنا المواطن أبن الوطن بلا وطن ، ماني من قحطان ولا من مضر
رقم ممسوح بهيئة اللمم ، وعَ الأمن القومي صرت خطر
كل زنازين الدنيا بتعرقني ،و عَ جبيني توقيع منهم إنمهر
*****************************
كل فقير عَ ظهري إغتنى ، وكل مغمور بقضيتي إنشهر
وبكل قريه مشيكه بحدود دوله ، فشر اللي يعاديها فشر
نصب النا مشنقه ودلى حبل ، وشباب بعمر الورد إنقبر
وصارت معالمنا وذكرياتنا ، سجون وقبور وحُفر
وصبرنا الف الحمد لله ونلنا ، حُكًم ذاتي وشرطي مفتخر
وعلم تحت علم السفاح اللي ، من الدم ما انغسل ولا انعصر
وظل الكرم للدباعي سارحه ، والناطور نام ليله وشخر
وانا المواطن ابن الوطن بلا وطن ، بحلم بالأمل يرجع من السفر

تقرأ بلهجة أهل سنجل