سامر-1
لون من ألوان الغناء الشعبي الفلسطيني
تأليف : الداعي بالخير صالح صلاح شبانة
Shabanah2007@yahoo.com
يا ساهر الليل والنجم رفيقك ، حبيبك وفي ما ظني يبيعك
طلِن عَ الخلا أربع صبايا بُكَّر ، إيلقطن حمَيضه والسَيِنْ وزعتر
يا عاشق القمر شو إلك بعشق النجوم ، اللي صبر ظفر وراحت على المحروم
يا ربي لا تحرمني محبة أبو قذيله ، ولا تنيمني من دونه ولا ليله
غزالي يَمّه نَصَبِـتْ الفخ تصيده ، صادني يمه بسهمه وصرت مُلُك إيده
يا للي عشقت الحلو لا تخلي الحلو يتحَيَّر ، العشق من الدم نازل ولونه أحمر
طولك رمح خصرك ضامر ايجنن ، عيونك توقع الطير اللي في السما متسلطن
يا بنت يا للي سيف أبوكِ إنجلا في الرقابِ ، قديش من روس العِدا نزّل وقدّيش جابِ
يا بنت يا للي ناصبه فخِ الغرامِ ، إتصيدي الشبابِ صيد الحمامِ
يَمّ الجدايل شقارها ذهب سايل ، خطماتك عَ الأرض خطم الأصايل
رميتِ قلبي بسهم طلع السهم قاتل ، ظليت تالي العُمُر تايه العقل وذاهل
صيّادي يا للي صِدِت غزاله في البَرِِّ ، قديش ذقت من الشوبِ والحَرِّ
جرحتني بالخنجر يا للي خنجرك دامي ، محبتك قتل وانا جرحي سامي
يا جاي من بعيد وشو خطر عَ بالك ، ما ظني مرسالنا وصلك ولاَّ جالك
عَ نبع الميّه شفت الحمامِ بتفلى ، لهف قلبي عِشِق وصابته عِلّه
عِشّق الصبايا قضا وقدَر على قلوبنا ، يا ربي تديم المحبه ويسلم محبوبنا
سرينا من الصبح بدري على الخلّه ، نلقط من الزعتر والشومر والبقله
نزلت عَ الطابون بالمسخن والفطاير ، يا ريحة خبزها تجبر الخاطر
شوق النفس حلم يناغش القلب بحنيّه ، مثل هوا الشرقيه يناغش الشتويه
طلع البدر من بين الغيم يلالي ، يا بدر مرحبا بك ما غِبِت عن بالي
مِرِّن صبايا بغرور الحلا هايماتِ ، بطلع للصبايا يتيهن بالحلا عَ المخلوقاتِ
محَوّطه بعين الباري هيه يا بلدنا ، انتِ الحبيبه الغاليه وحبك قدَرنا
زرعنا أرضك حبوب وقِثّه وقيطاني ، يا ربي اتخلي بلدنا دُرّه عَ جبين الزمانِ
احنا اللي مشينا من دَرِب لدرِبِ ، جينا نتطبب بشربه من نبعك العَذِبِ
شرفتموني يا للي جيتوا من بدري ، فرشتلكم رموشي وفتحتلكم صدري
يا دارِ حِنا جينا نبارك للي عادوا ، للي بنوا مجد الوطن وشادوا
مبروك عَ الوطن جنوده البواسل ، اللي يوم المِحَن بالسيفِ يهزموا الباطل
يا سيفِ عَ رقابِ العِدا ظلك مسلولِ ، تحمي جدايل وتردِ جحافل المغولِ
يا قطز سلم لي عَ صلاح الدين ، وقول له الملتقى في سهل حطين
سرينا عَ الحصيده نغني للمنجل واللي جلاه ، جاوب الصوتِ وردد حيّ على الفلاه
يا بنت عمي وش كرَّهِك فيَّ ، واحنا أهل وحبايب واحوالنا غِيّه
يا بلاد الخير والخير زايد ، وريت شمع الفرح في بيتكم قايد
تقرأ بلهجة أهل سنجل
