سامر-2
لون من ألوان الغناء الشعبي الفلسطيني
تأليف : الداعي بالخير صالح صلاح شبانة
Shabanah2007@yahoo.com
أنا بطلتِ صنعة الحطب ودَشّرتِ النجاره ، وصرت شيخ نسوان واتسرمح بالحاره
بَلّيت القلم بلساني وكتبت عَ السطر إسمك ، يا ريتِ مثل الكوبيا يذوبِ قلبي بقلبك
سهمك صاوب القلبِ وجَرّحني بسِنانه ، نيال اللي انجرح بسهم الحبيبِ ولاَّ عَ شانه
سرينا عَ الصبر قبل ما الندى يتبخر ،بلكي عَ شوك الصبر عن الصَبِر نتصَبَّر
تحت الجفن يا حلوه ذرِّة كحل حطيني ، وانا المجروح بجرح الهوى يا مين يداويني
يا للي مَرَقتِ عنا وبوجهك صَدّيتِ ، حلفّتِك بالسبب بربِ البيتِ
شدّيت عَ الجرح وظله الجرح أخضر ، جرحي ما شِبِع من الطيون والزعتر
يا زارعين الورد شوفة الورد نوّر ، نيّاله من قطف الورد ومن عطره اتعَطَر
سميت بسم الله صليت على محمد ، نبي من الله مرسل عليه الخلايق تتعَمّد
يا ربي ليش العِشِق يحُط جوّانا جروح ، يعَذِب القلب فينا ويشعِل الروح
يا بنت يا للي طالعه عَ السطح تنشري غسيل، جرحتِ القلب بنظرتك وصار دمي يسيل
جيتك تداويني يا بنت يا دكتورة السنان ، خوفي من الحفّاره تحط براسي جنان
يا مختار لا تميِّل الطربوش واتهز العصا علينا ، احنا غير الحلا ما شفنا ولا رأينا
ام لِعيون السود الرب اللي خلق مباريها ، سهم يقتحم عَ لِقلوب جوّه مخابيها
شوفة الوجه لِمليح ترد الروح من غربتها ، يا ويلي من ام عيون سود محلا كحلتها
حِنّي علينا يا وردة الصبح بالندى الندِيه ، لولا الملامه لقطفك واقدِّمِك للحلو هديه
مزروعه جوّه القلِب بستان أزهار ، ومغلقه جوّه القلب صندوق أسرار
حبك لو انه في الثريا بأيدي لطوله ، وارشفه رشف الشذى وانسج غرامي عَ نوله
خبيت الدمع جوّه القلب قلت كفى يا عيني ، خلي الحرق جوّه القلب وعَ اللي جرى ربي يعينِ
جوّه ضلوعي قلب يرفط مثل الطير الذبيحِ ، ومهجة القلب من حَرِّ الجوى نتسيحِ
يا سامعين الصوت ليش ما بتردوا علينا ، احنا عُشّاق ونار العشق كاوينا
وردن عَ العين حاملات جرار الميّه ،حواري الله يسعدهن شو ساون فيَّ
سمّيت أنا لمّا شفتها بسم الرب الدّيانِ ، وصليت وسلمت عَ النبي العدنانِ
سمرا تحسابها ليله ببدر السما مضويّه ، إتّيه عَ النجوم أحلى من القمر بشويه
ردي علينا بالله يَمّ الشاليش الطاير ، مَرّيتِ عنّا وحطيتِ في القلب جرح غاير
ثوبك لِِمطرَز من الحرير الغالي ، شوفته عليك سحر بَلبَل احوالي
جانا المطر خير بعد ما شوربنا ، وبضراعة العبد للرب العالي سألنا
الشهيد اللي أسقى الأرض من دمه ، كله كرمال جدايل خواته وامّه
حنّون الأرض يشهد على قداستها ، شهاده كل ما نزل مطر يثبتها
يا لله قوم احرث وطاتك المطر عَ البابِ ، الأرض بدها حكمة الشيوخِ وعزم الشبابِ
فدّانك عَ الدلال مربى معلوف بالِمّنقى ، ليوم الموسم وتشِد النير والسِكَه
سمعت صوت الوطاه عليك بنادي ، صوت بالشجن مليان بغنّي امعَنّى وقَرّادي
تقرأ بلهجة أهل سنجل