سامر-3
لون من ألوان الغناء الشعبي الفلسطيني
تأليف : الداعي بالخير صالح صلاح شبانة
Shabanah2007@yahoo.com
يا ساهر الليل اسهر على كيفك ، وانا متوّسِد الليل أحلم بطيفك
شوفك بِرُّد الروحٍ والقلب بتهَنّى ، كل ما قلت عوافي ومرَقِت عنا
يا لابس الثوبِ ثوبك ها لِمّقصّب ، خليت القلب جوّه مهجتي يتعَذّب
حِفّيِت القدم من مشاويرها قدّامِكُم ، والأُذن مشتهيه تِسمَع كلامكم
وردِن غزلان البلد عَ العين يملين ميّه ، حرقن الحشا جوّه وما قالن اخطيّه
منذور أنا أعشق واخبّي أشواقي جوّه ، يا قلبي من عِشق الصبايا انعمى ضوّه
طلبت الميه أطفي من الظما حروقي ، طلع الظما من اللهفه والحرقه من شوقي
يا زارعين الورد ضاق بالورد قوّاره ، وما ناب العاشق عِشِق من طول انتظاره
نامت عيون الخلايق وعيوني سهرانه ، ترقب القمر يطل من لِغيوم الحيرانه
يا شارب البحر اشرب فوق البحر بحره، وما بحِس في الجمر الا اللي انكوى بجمرهَ
وجهك صبوح من غير صباغ وغندره ، وعيونك من الله مكحله من غير كحل ومَسّكره
يا حارس البيت احرس بلادنا بعينك ، انت رب السما واحنا المؤمنين بدينك
سمّيت بسم الله رب البريه ومشيتِ ، حمدت عَ النعمه الله وعَ النبي صليت
ِيا محمل جمالك صبر قشِّر صبر واعطيني ، يا ريت الصبر يظله وليفي وما يجافيني
جرّحتني بجرح الهوى جرح الهوى سامي ، جراح الهوى قيّحَت وما عدت منها أنامِ
يا عاقد الشوره جبينك بالعرق امندّي ،ريتك يا حبيبي الهاجر ترجع على حَدّي
شفت الجفاري السُمُر سارحاتِ عَ المرعى،شعلقني بغرامهن وحطن في القلب لوعه
يا سيدي يا لخضِر يا للي قتلتِ التنينِ ، شو أعمل بحبيبي اللي مجافيني
لمين اشكي والشكوى لغير الله مذله ، على حبيبي اللي عليّ بتدَّله
اسمك غندوره ومعلقه بقلبي العاشق ، لا ني قادر أنالك ولا ني قادر أفارق
الله يجازي اللي دلني على باب داركم ، لوعه وحرقه نلنا وما قدِرنا على فراقكم
صلوا عَ النبي وزيدوا النبي صلاه وسلام ، وكفوا عن تعذيبنا اللي بتعملوه حرام
يا ساري من دغشة الصبح عَ لِمّشَطًَب ، لِمّشَطب محمم بالندى والمزيونه تتحطب
يا لابسه التقطيبه والقذله عَ الجبهه تلمع ، حلّفتك بالله ارحمي قلبي ها للي بتوّجَع
مرّيت عن داركم لقيتِ الباب مفتوحِ ، ومن أول نظره حصلت مليتيني بِ لِجروحِ
يَمِّ لِجروح اللي تِجّرَح ولا تسَمّي ، ريتك من حظي ونصيبي وتصيري بنت عمّي
يا طولك طول السِِرو وريحك معطر ، وجعودك حبل الجَمّال وعيونك تِسّحَر
شفت في عيونك نظرة غزاله شردت ، صاوبت القلب بسهم الهوى وجَرْحَت
يا ريتك مباركه عَ صاحب النصيبِ الغالي ، عَ اللي عاش العمر عاشق يسهر الليالي
مقطوفه من قِوّار القلب ريحك معطر ، ورده شربت من الدم انصبغت بِ لِحّمَر
حبك مخزّن جوّه القلب والحنايا ، يا ترى إنتِ معي ولاَّ مش معايا
يا ساريه عَ المحطابِ الصبح بدريه ، حجة اتلمّي حطب ولاّ إتدّوري عليّ
تقرأ بلهجة أهل سنجل