مواويل -1
محطات تراثية رباعية محكية
تأليف : الداعي بالخير صالح صلاح شبانة
Shabanah2007@yahoo.com
الله ع زخ المطر وشقع المزراب ، والميه تعانق الأرض عناق الأحباب
ولهفة الفلاّح برد وسلام ، وفرحه بعد طول الغياب
*******************
طرحة الخبز في الطابون يا سلام ، ومسخن جاج ع جوز حمام
والضيف في العِّلّيّه ضيف ع الكل ، يتعشا وبنتسامر وبنام
*******************
لبدّنا القطين في الخابيه مونه ، غموس للبسيسه قدام الداخونه
وغز الحطب قدام الوجاق شغّال ، والدفا في السقعه أمنا الحنونه
*******************
بقى سيدي فارس و فارس ، في زمن انهفت فيه الفوارس
بقى ابن و الأرض الخلا والبور ، ابن الحقل والحاكوره والمارس
*******************
هدهد الليل واسترخى البدن التعبان ، واحلوت القعده ولَمّة الجيران
وللمنطار تعليله بتشرح البال ، ومع الخراريف بتحلى أيام زمان
*******************
ما أحلى من كرم العنب غير كرم الرمان ، والتين استوى أشكال وألوان
ولما الشمس بتسطع في الصيف ، بتلبس القريه الثوب والقفطان
*******************
بنات البلد إن نزلن ع العين ، مايلات ألعصبه مكحلات العنين
شوف يا قلب واشبع حسره ، ومنين تطول الصبايا منين ؟؟؟؟
*******************
بالحمد بتدوم النعم وبتزيد ، والأرض بدها اللي يخدمها مثل العبيد
يسقيها عرق ويغرق فيها محبه،والأرض بدها عضل مفتول وسواعد حديد
*******************
بيني وبين القريه عهد محبه وغرام ، ما قدرت تمحي منه اشي الأيام
هالقريه مدقوقه في قلبي من جوّه ،ميجنا و عتابا و آهات وأحلام
*******************
صباح الخير ياعود لِحّراث ويا فدان البقر ، صباح الأرض المشتاقه للمطر
صباح الأمل اللي بقلب الشوك لورد،يعانق السما وبتتعلق فيه عيون البشر
*******************
نامت القريه في خواصر الزمن ، بإنسانها اللي تحدى المحن
لولا الفدان المنجل وعود لِحراث ، ما صارت أرضنا جنة عدن
تقرأ بلهجة أهل سنجل
