مواويل -12
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
يا رب أتجَمِّع ها لأمه على إشي أكثر من منسف ، واحفظ أموالها بأيدي أمينه ولا تهدرها بالمصرف
مال العرب رايح للشيطان من كل شعب ومِلّه ، وشعب العرب مَيّت من القِلّه يشوف ويتحسف
**********************
استنكر يا سيدي كل ما استشهادي قتل يهود ، ما هو دمهم أغلى من دمنا وهمه ليهوه شهود
واحنا دمنا أرخص من معجون البندوره ، أرخص من بويا الصرامي ونسلنا منحدر من لقرود!!
*********************
حطت عَ المينا السفينه وفيها جيش مدجج ، جاي يعطينا حريه ويخلينا شعب مبرمج
نمشي عَ كبسة زر بالريموت كنترول ، واللي بتململ رَح يوكل ضرب لمّا يتطعوَج
**********************
صوتك مثل مطرب الحي عمره في الحي ما أطرب ، وكسمك قد ما هو حلو بقولوا عنه أجرب
هيذ الدنيا ..لا تزعل الدنيا مضروبه بصندل ، وانت لازم حتى تعيش يطلعلك ناب ومخلب
**********************
تاريخك مليان أسماء مثل الشمس بتضوي ، وتاريخك مليان أصوات مثل الكلب بتعوي
خذ من الشمس والقم الكلب حجر ، واحكي عن أمجاد الأمه ..... واروي
**********************
سلاحك لمبرمج عَ الحاسوب جايز يقتل جسد ، وجايز يهد دار ، وجايز يخرب بلد
بس مهما بلغ ما قتل فيها الإراده ، ارادتنا أقوى من النار ذات اللهب
**********************
شو بتنفع لِعطاره في بلد ريحتها خمّه ، وشو بتنفع الشمعه في ليله تحلك فيها العتمه
بس يا ترى؟ نرمي العطر ونطفي الشمع ؟؟ ، ولاّ نستنهض كل عطور وشموع الأمه ؟؟
**********************
في مختار بجمع أهل القريه عَ الحب والمودّه ، وفي مختار برقعهم أسافيل تتضربهم القرده
والناس أتباع لمن غلب .. ويا ويل الجمل لن طب ، تلاقي كل من اجا حمل من لحمه فرده
**********************
عميا بتحفف عوره والطرمه تتنصت عَ الباب ، هذا الحال اللي هَدّ الجسد وخلى الشعر شاب
البصير امعَصَب والسامع امضَرَب وتبدّلت ، غزلان الأمه بقرود والأمل خبَا وخاب
**********************
يا راكب عَ الجحش لِقطش خلي المركب ساير ، لا تعطل مسيرة ناس ولا تخلي لِمكاري خاسر
بقت المرجله للناس أيام الماضي عنوان ،صارت المرجله ها لأيام عصفور مرفرف وطاير
**********************
خردقتونا قد ما غزغزتونا أبر بنج لجل التخدير ، إخص عَِ اللي بعتلوا منابر الخطابه لجل التنظير
إحنا قرفنا وتقلعطنا من الصفصفه والحكي ، ملعون لِمطنش ومخنس مثل الخنزير
**********************
تقرأ بلهجة أهل سنجل
