مواويل -13
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
حُط رغيفك عَ كردوشي وخلينا نوكل سوا ، رغيفك وكردوشي من قمح وذره للجوع والطوى
وما دامك معي نزرع الأرض ونحَسِّن نبتها ، إحنا بأمان من المجاعه وبنزيد بأس وقِوى
**********************
اللي كسر سيفي ورماه عَ المزبله إنت يا أخوي ، لمّا تخليت عني وكشفت ظهري وما رديت عَ أبوي
أبوي قال : لا يتخلى أخ عن أخوه ، المتخلي عن أخوه بايع دمه للذيب يا خوي
**********************
راسي وميت سيف غير أجيب لأخوي الغريب ،حِكمه ورثناها انه الغريب لازم يبقى أديب
بس طلعت حكمه مهريه والغريب عدو ، والعدو ما بصير حبيب غير لمّا لِحمار يصير طبيب
**********************
لا تصدقوا اللي قال الشمس بتتخبى بالغربال،الشمس أكبر من الأوهام والأحلام،حتى والآمال
الشمس فوقنا واحنا كل صبح نستناها ، تطل علينا من العالي مزينه خد السما مثل الخال
**********************
المدفع مصدي وبطل ايرش الرشاش ،بقى يرش كل ما غنى مغني وشاش
ولما الصبايا حرّمن يرقصن بعرس ،صدّا المدفع وصار كل ما قذف طاش
**********************
لو كويتوا قلبي بجمر الدنيا قلبي ما طاب ،قلبي مليان حزن مدكن على اللي غاب
لو الحزن كحل والفرح مرود ينجر عَ الجفن ،لخليت الجفن يتقرح وحطيت بدال الكحل تراب
**********************
الغابه بدها سادن يحمل معه مبرد وقدوم ،كل ما طل ناب السبع يفط عليه ويقوم
يبرد الناب ويقص المخلب وهذا المطلوب ،إذا بده يعيش في غابة الموت حواليها يحوم
**********************
قوم كنّك زلمه أحرس صيرة الغنم وخم الجاج ،عبي الجفت ودير بالك وسَيّج دارك بسياج
اللي بخطف اليوم ديك بكره بخطف ثور ، واللي بعده بخطف روحك لأنه بعرف إنك خداج
**********************
أنا متفرج مثلي مثل الناس مين يدَّخِل جول ، جايز أتحيز لفريق تتحلى القعده ويحلى القول
الحرب عِنا ومش إلنا واحنا بنتفرج عَ الشوط ،ها لحرب علينا صارت مش أكثر من لعبة فطبول
**********************
عجيب كل مليح بندشره يفلت منا ويروح ، عجب كل قبيح بنترتح فيه وبنفديه بالدم والروح
من يوم صارت سيوفنا خشب للرقص ، بطل فينا حيل إننددي على إيد المجروح
**********************
يا طرشه يا للي بتتنصتي عَ الباب خبري شو صار ، يا ترى البس فِلِت وقِدِر يمسك الفار ؟؟
يا طرشه لتروحي فقدت البصر مثل السمع ، وصرت مثل العدم .. شوية سكن بعد ما بقيتِ نار
**********************
تقرأ بلهجة أهل سنجل
