مواويل - 37
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
يا حارقه القلب بنظره أسمط من الجمره ولهب النار ، حِنّي على شايب عاشق معذب مَعْشي الأبصار
شوف الحُسُن لأبن الستين يزغزغ القلب اللي انطفا ، ويعيد الوهج , وبركب جناح الذكرى للماضي مشوار
*******************
في نسوان مثل الحنظل بسِدّن النفس سددان ، ونسوان مثل الهرايس توكلها لو امّهَدّي عليها الذبان
ونسوان مثل الورد تشمها ما أحلى عِطِرها وطعمها مُر ، وانت وحظك يا عاشق يا بتطير وبتحَلِّق يا بتعيش ندمان
*******************
مرّات الوجع مهما بَهّرَج وحِمِي بنطفي بجرعة يانسون ، ومرّات بكلمه تبلسم القلب اللي انجرح ولاَّ لبخة طيون
بس الإحساس بالظلم والتهم اللي بتوسخ الأسم النقي ، بتغتال شخصيتك وبتلطخها بالوحل وبتقودك للمنون
*******************
لمّا بقى بياع التمريه يطل عَ البلد وينادي هيه يا تمريه ، انحَلِّق عليه دايره ريالتنا تسَيِّل اولاد وختياريه
واللي معه قرش ولاَّ تعريفه يشتري ويوكل ويطعم ، واللي ما معه يشتري بجوز ولاّ فردة صرمايه مهتريه
*******************
بقى عَ بالي وانا شب أتعلم طبال وارافق سميره توفيق ، بقيت أعشق غمزتها وختيرت وغمزتها بتغفي فيّ وبتستفيق
قدّيش بقيت أحلم بحمل الطبل واسوح في أرض الله سوّاح ، بس أبوي جوّزني وراحت أحلامي في الموقده حريق
*******************
قديش مبدع بقى يتوهّج إبداع مثل ذبالة السراج ، بس اصطدم بخاين أناني سكر آماله بالرّتاج
خاف على موقعه ويبقى مثل اللي جاب الدب عَ كرمه ، ومات مبدع وهو حيّ ضحيه للأنانيه واندثر الأنتاج
*******************
لمّا هدْبَد سيدي وخف النظر عنده في الليل ، وصوا له عَ كرشات مسميه بأسمه ترد الحيل
بقت طبخه معلقه بالقدره عَ النار ريحتها تشهي ، أكلناها الصبح سروه وطِلِع سيدي يطارد عَ الخيل
*******************
صِرتِ حماه والك كِنّه وبعدك زغيره مثل الورده ، صرت ست وجدّه والك حفيد واللي ما عنده عقبال عندّه
كبرتِ قبل الآوان يا وردة القحوان وخدودك حنّون ، ويا ما غيرك أزغر منك لا عندها كنه ولا حفيد صارت مثل القرده
*******************
أحلى ما في الدنيا تبقى عندك مَرَه مثل طلق النعنع ، وولد مربيه مليح اذا طلبته لقيته يسمع
بس لمّا تبقى بلا قافه مخموم بحالك ومتحالي ، وعامل في الدار سجّان ووالي بدها الدنيا بمقفاك تِشقع
*******************
سياره مثل الطياره سايقها قبطان مُر,الشفرَنَه نساها ، لمَا قعد ورا مقودها وشغل ماتورها وبنزين أعطاها
صارت تحصد عَ كل الحالات ضحاياها شباب وبنات ، يا رب تقطع طنا اللي صنع عَ اللي استورد عَ اللي قناها
*******************
عمري صرفته بالطول والعرض أحلم بالجمال ، والجمال حولي وحواليّ بس الجيب خالي من المال
كل ما رحت أطلب عروسه بنت حسب ونسب ، قالوا لي خرخش الجيبه ولاَّ فارقنا بالحال
*******************
تقرأ بلهجة أهل سنجل