مواويل – 45
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
يرحم اللي بقوا يعزّوا الأرض ويزرعوا حشاها،يرحم اللي بقوا يزرعوا الشجر ويعيشوا احذاها
بقيت يا سيدي سبع ليل وزمانك بقى عز،يا خساره بعد ما مُتِت صارت الأرض بور وراح جناها
*******************
لحم الإنسان معصفر ومبهر لفتح الشهيه ، تفضل يا سيدي اتعَشّى وخذ لك هديه
لحم الإنسان ما أطيب أكله كيف ما كان ، نِيّ ومطبوخ ومشوي منه كباب ومنه صينيه
*******************
الكلمه لِمليحه بتِطلع الحيه من وكرها ، والأيام الخوالي عَ القعده يحلى ذكرها
ريت رحمة الله تنزل على سيدي وستي ، اللي أيامهم الخوالي لليوم فايح عطرها
*******************
أنا مدين لحامل القلم اللي علمني وما صار قدّي حدا ، أنا مدين لحامل القلم اللي جلالي عن قلبي الصدا
بس أنا مدين للعادات والأوابد وللأب والأم والعم والخال ، اللي نوّروا قلبي وخلوني أكبر بعلمهم عَ طول المدى
*******************
كل ما ثارت عِلّه جوّه الجسم رحنا عَ الطبيب الجرّاح ، يمسك المشرط ويجرح الجسم وتلاقيه في البدن ساح
وبنقول شكرا إلك يا طبيب ويقبض الحق غانم ، بس لو واحد عن غير قصد فشخنا بنرفع عليه سلاح
*******************
لو جبتوا كل زمارين وطبّالين الدنيا ما حدا جمعنا ، بقينا عيله كبيره وبس نزل الراس قمنا ِتَبعَثُرنا
ضعنا بين المصالح ومين فينا يصير سيد الدار ، انهَدّت الدار وما حدا ساد ولا فزنا ولا استفدنا
*******************
جايز تعمل مني باشكاتب كبير وتقعدني بصدر الديوان ، واحمل عصاه واشخط واضرب واعمل في مكتبي طرزان
بس مش ممكن تعمل مني أديب موهوب قلمه سيّال ، ولا مبدع أصنع أدب رفيع ولا تساوي مني فنّان
*******************
بقى منطار سيدي شامخ في الكرم عالي الراس ، رمز للعين الساهره عَ الرزق والأرض تنداس
وبقت عين سيدي مثل عين الصقر قويه ، تشوف الضيف واتّهَلّي فيه والحرامي ينضرب بالمداس
*******************
الفن علم وابداع وثقافه ، وخفّه عَ جناح الحلم رفّرافَه ، الفن من عصارة القلب محلوبه قطراته بلطافه
الفن إشي سلس وجميل بدخل العقل والقلب ، قدّيش ببقى صادق برفعك وبزيدك شرافه
*******************
لمَّن إجا جحا يحلب الثور ، قامت لِقيامه وحطت عَ جحا المبتور
راح الجلد وراح اللحم وانّسَبّ جحا ، الراضي يرضى والزعلان يروح مفزور
*******************
من حقي أحلم بالشمس واعشقها وادخلها بداري ، من حقي أستناها بعد الفجر وانا عَ العمل ساري
من حقي أحلم بزيتونه لا شرقيه ولا غربيه ، من زيتها لِمبارك أوكل واطعم أهلي وجاري
*******************
تقرأ بلهجة أهل سنجل
