مواويل – 54
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
شباب في الحقله بتحرث ، بتكرب، بتثنى عَ الفدان ، وشباب تلاقيها مِنْحَلة تعمل في الكرم والبستان
وشباب صايعة ضايعه الله يا رب تكرم النسوان ، يطرقع في اللبان مثل الولايا اللي بتمرمغن بالأحضان
*******************
لماّ المسرى يبقى أسير المحتل يمنعك عنه بالنار ، ولماّ المهبط يبقى أسير الحامي يمنعك عنه بالقرار
ضاعت الدنيا بين الأمين والخاين وحرنا وين ، وكل يوم بهدوا أركان الدين تتصير القلوب خوار
*******************
ضرب الحبيب زبيب وحجارة الحبيب قطين ، كل شيء من الحبيب ناعم وطعمه حلو وزين
والحبيب عَ القلب غالي وكل فعله غالي ، والبغيض عَ النفس حتى لو سبّح الله تحسه ثقيل وشين
*******************
كل دقة كل نبضة كل خلجة من نفسي تنبض بالقلب ، تنادي اسمك وتعانق رسمك ويقبض فيها الحب
كل نظرة كل بسمه كل همسه كل وشوشة ، معناها إنت يا للي كل ما عتقت فيّ تزدادي قرب
*******************
قديش يؤلم عَ النفس البعد عن الناس والجفا ، قديش مدينا جسور لمحبة الناس والوفا
كل ما زدنا قرب زادوا بعد وهدوا الجسور ، وكل ما لعنوا الظلام أضوينا شمع بس الشمع انطفا
*******************
يا أرض طولي من طينك وحني عريس الزين ، عريس الزين بده يتحنى وبده يكحل العين
عريسك يا أرض من الدغشة سرى حامل حلم ، ومن جوه الجرح الورد يلبسم الأنين
*******************
أعطيني ذانك أوشوش فيها سري ، سري العميق اللي على باللي يطري
أنا عاشق لعيونك ودمي يرخصلك ، ينبت من قلبك حنون أحمر وزعتر بري
*******************
مثل الحرامي سرقني البرد لماّ غافل الغطا ، أنا بقيت أحلمْ في الزرزور طلع لي القطا
سنة القطا بيع الغطا وسنة الزرزور أحرث أبور ، سرقني حبك الحرامي لمن على قلبي سطا
*******************
ربي للجمال والحلا مسخرني حارس خفير ، للأرض إن إتأخر المطر أبذر القمح عفير
ولعيون الصبايا يا مرود عشق مغمس بالكحل ، كل ما انجر عَ الجفن جر التاريخ معه الأساطير
*******************
عند السخره بحمل مهره وعند أشغالي مايل حالي ، هيذ الدنيا وهيذ العبرة ولالي يا قمر لالي
يبكي تعود ما يتحدد ، يكسر قيد بإيده ويتمرد ،بيتي مكركب عن شغله ويتهرب وبيت الجاره ينطق بأفعالي
*******************
أيام الماضي عَ البال بنتطرى فيها الأرض والمنطره ، فيها حب مثل المطر من الغيمه عبا الجب والمطره
اسقي التينة والزيتونه واللوزه والبرقوقه ، وتبت في ذيال الأرض طيونه وريحانه وعطره
*******************
تقرأ بلهجة أهل سنجل