مواويل – 56
محطات وجدانية رباعية محكية
تأليف : الداعي بالخير صالح صلاح شبانة
Shabanah2007@yahoo.com
إذا عرفت تمغيب مغيب وإن وقعت صير زلمه طيّب ،ودير بالك عَ العمر استغله للخير قبل ما تشيب
وعز نفسك تجدها واللي بعمل من حاله مزبله ، بتنعفه الجاجات وبصير أوهام وحكايات تيّخيب
*******************
قالوا ظالم قلنا وين العادل يا منظرين يا كِرام؟ قالوا حرامي قلنا وين الشرف في سِبر الحكام ؟ قالوا ماخذها مقاوله من الكرسي لجوّه القبر ، قلنا غيره ورّثها وفصَّل عَ قياسه دستور ونظام
*******************
قصي وعُدَي لمّا ماتوا ما ماتوا في روما وباريس ، عدي وقصي ما قبلوا يصيروا في السيرك قرود ونسانيس
وما قبلوا يبقوا كورس في جوقة بوش وبلير ، قصي وعدي ماتوا برصاص المحتل بشرف وهمه وكرامة الأحاسيس
*******************
لو صدام حسين خاين وبايع أرضه للأنجاس ، كان لقيته بتمتع بثروة العراق مع الدِّن والكاس
كان ما انحرق كبده وانبتر بولاده الثنين، بعدي وقصي اللي استشهدوا بشرف مرفوعين الراس
*******************
حزن القلب والله لمّن ذاعوا علينا الأخبار ، وقالوا أولاد أسد بابل القوي انطخوا بالنار
بس المفرح انهم ماتوا بأيد المحتل وما طاطوا ، ظلوا عَ عهدهم نشامى وماتوا وهمه أحرار
*******************
ملعون اللي بقول بخيانة قائد العراق ، ملعون اللي زمّر وطبَّل مع جوقة الخيانه والنفاق
صدّام عمره ما خان ولا لوّث شرفه النظيف ، صدام بنى وعَمّر وتهمته مش للبيع بالأسواق
*******************
ازرعها أرضك قمح وزيتون للأبد بتغنيك ، بتعيش بأرضك سلطان عَ العرش متوِّج قلبك
اللي زرعوا الأرض الحمرا فلل وعمارات ، باعوا المستقبل للأمريكي بباره وملتيك
*******************
إنّ الله كِرِه عبد وحَب يكرّه العباد فيه ، خلاّه ثرثار وسلّط لسانه الزفر عليه
خلاّه كرباج بيد ابليس الوسواس الخسيس ، كل ما فترت عنده الهمّه وبورَدْ إيحَِمّيه
*******************
من أخلاق الأسد ما بفترس الا عَ الجوع ، وانه ملك الغابه هي التابعه وهو المتبوع
ومن أخلاق الذيب الغدر والقتل والتنكيل ، إن فات صيرة غنم دشّر صاحبها بالرزق مفجوع
*******************
لولا رحمة الله واحنا برحمة الله طمعانين ، يعاملنا بفضله مش بقدّيش إحنا مستاهلين
كان لا لمعت بسمه عَ شِفِه ولا رف القلب بفرحه ، كان مضينا العمر من يوم الفزع مرهوبين
*******************
يا ربي عاملني با للي انتَ أهله يا رب ، يا رب لو تعاملني باللي أنا أهله بهلك وبَنّدَب
بنار جهنم الحمرا أم الهوايل وانا مسكين ، عبد ما بملك من نفسي إلا الطمع بعفوك يا رب
*******************
تقرأ بلهجة أهل سنجل
